Nagpapolis-polis nanghasi gireklamo

CEBU, Philippines - Usa ka nagpapolis-polis nga gikatahong hubog gipasanginlang mipugos og sulod sa boarding house nga giabangan sa igsuon sa iyang higalang babaye didto sa barangay Poblacion, dakbayan sa Talisay sa miaging gabii.

Si Felisa Romano, 20, maoy misumbong sa maong hitabo sa Talisay City Police Station tungod sa kahadlok dihang si Geofrey Borinaga, taga barangay Canduman, dakbayan sa Mandaue kinsa nagpailang polis nga nadestino sa Mandaue City Police Office kalit lang mitungha ug mikomprantase kaniya sa walay igong rason.

Si Romano niadtong higayona didto sa boarding house nga gipuy-an sa iyang maguwang nga maestra sa barangay Poblacion.

Unya gimanduan kuno siya ni Borinaga nga paablihan ang atubangang pultahan sa boarding house apan wala siya mamati niini. Busa mihiwasa kuno sa kasuko ang suspek ug gipugos og abli ang bintana sa boarding house.

Ang Banat News mitawag ngadto sa Administration Office sa Mandaue City Police Office (MCPO) pagpiho kung si Borinaga usa ba gyud ka polis sa dakbayan sa Mandaue, aron usab kini makuhaan og pamahayag, apan si Juliet Velasquez, usa ka non-uniform personnel sa (MCPO) nagkanayon nga wala sa ilang listahan sa organic personnel ug Field Training Program (FTP) ang nahisgutang ngalan. (BANATNEWS)