Kagawad ug laing usa pa naghikog

CEBU, Philippines - Duha ka mga tawo ang gidudahang naghikog sa managlahing dapit dinhi sa Sugbu niadtong adlaw’ng Domingo, usa sa mga biktima opisyal sa barangay.

Patay nang nakit-an ang kagawad sa barangay human kini naghikog pinaagi sa paglaslas sa iyang pulso sulod sa pansayan sa pinuy-anan niini sa barangay Guiwanon lungsod sa Ginatilan niadtong Domingo sa alas 8:30 sa buntag.

Ang napalgang patay mao si Elmer Demol, 39, kinsa negosyante ug kagawad sa nahisgutang barangay.

Matud ni PO1 Aljen Romero desk officer sa Ginatilan Police Station dihang nahinabi sa Banat News ang igsuon ni Demol nga si Angelita Tuazon, maoy nakadiskubre sa kagawad nga nagbuy-od na nga wala nay panimuot sulod sa pansayan niini.

Subay sa inisyal nga imbestigasyon si Demol naglaslas sa iyang pulso gamit ang blade ug gituohan nga nahutdan kini sa dugo hinungdan nga namatay base sa pagsusi sa municipal health doctor nga si Rey Jabagat.

Ang maong opisyal gikatahong adunay gihambing sakit ug niadtong adlawa misulod kini sa kasilyas ug wala na mogawas hinungdan nga gisusi sa mga igsuon apan patay na kini.

Samtang sa pasado alas 11 sa Domingo sa gabii usa ka Magdalino Trazo Salumag, 33, nga taga barangay Sabang, dakbayan sa Danao ang giingong naghikog usab.

Si Salumag napalgan sa asawa niining si Cristina sumala pa ni SPO2 Ildefonzo Prosia sa kapolisan sa maong dakbayan.

Si Prosia sa pakighinabi sa Banat News miingon base sa pamahayag sa asawa ni Salumag padulong unta kining mangasilyas dihang nakugang siya nga nagbitay na ang iyang bana.

Ang ginang na maoy mitangtang sa pisi sa liog sa namatay ug gihatod sa Danao District Hospital apan gideklarar kini nga dead on arrival.

Wala pa masayod ang kapolisan unsay rason sa paghikog niini apan namatikdan sa asawa nga aduna kini bug-at nga problema ug kanunay nang mag-inom.   (EIM) - (BANAT NEWS)