Gwen mireklamo batok ni Regal Oliva

CEBU, Philippines - Mireklamo si Governor Gwendolyn Garcia niining pagpangayo ni Mandaue City Treasurer Regal Oliva og special permit sa One Cebu Expo nga gipahimutang karon sa Cebu International Convention Center (CICC) nga gi-organisar sa provincial government.

Kini tungod kay matud pa sa gobernador nga ikaduha na kining higayong gihimo ni Oliva nga naka-apekto dili lang sa One Cebu Expo kun dili sa mga misalmot niini nga naglakip usab sa kagamhanan sa Mandaue.

Ang gobernador kinsa nagpakita sa hilabihang kapungot ug kalagot mibutyag nga ang unang higayong paghasol kaniya ni Oliva mao ang pagpangayo niini og buhis sa CICC apan nagpakahilom lang siya niadto. Karon matud ni Gobernador Garcia nga dili mahimong dili siya motingog kay gawas nga ang gitarget ni Oliva ang probinsya, gilakip na usab niini ang pipila ka local government unit ug ang syudad sa Mandaue. Midugang si Garcia nga wala gayud siya makauyon sa batasan nga gipakita karun ni Oliva. “ I do not appreciate his grandstanding antagonistic attitude” matud pa ni Garcia.

Samtang ang tigpamaba sa hunta probinsyal   nga si Manlalaban Rory Jun Sepulveda mibutyag nga dili na angayan nga mangayo og permit ang syudad sa Mandaue sa One Cebu Expo nga anaa sa CICC nga sakop sa iyang huridiksyon tungod kay una sa tanan, usa sila ka gobiyerno, ikaduha wala sila magnegosyo kay ang ilang gihimo usa lang ka exhibition diin nagpasundayag sa nagkadaiyang produkto sa Sugbo.  - BANAT NEWS