Nagluhod nabulit dinunggaban

CEBU, Philippines - Napalgang nagluhod ug naligo sa kaugalingong dugo ang usa ka tawo nga nabiktima sa pagpanunggab alas-4 pasado ang takna sa miaging kaadlawon sa sitio Soong, barangay Mactan, dakbayan sa Lapulapu.

Ang biktima mao si Johndyp Oyao, 24, nga taga sitio Lukata, barangay Looc, dakbayan sa Lapulapu kinsa gidunggab sa wala hiilhing mamumuno niini.

Si PO1 Franklin Bolaquia sa Homicide Section sa kapolisan sa maong dakbayan miingon nga sa sayo pa nakig-inom ang biktima sa pipila ka mga higala sa maong dapit.

Dugang pa niya nga uwahing nakit-ang buhi ang biktima dihang mipalit kini og beer alas-10 pasado ang takna sa gabii sa miaging Sabado apan wala na mabalik.

Kaadlawon na kagahapon napalgan ang biktima nga patay na ug may mga samad dinunggaban sa walang dughan niini. Matud pa ni Bolaquia nga ang ig-agaw sa biktima nga si Edwin Igot maoy nakakaplag niini kinsa dali nga nakapangayo’g tabang sa Emergency Rescue Unit Foundation (ERUF) kinsa midala sa biktima sa Lapulapu City Hospital apan namatay na kini.

Wala pa matino sa kapolisan si kinsa ang kriminal ingon man ang motibo niini sanglit nagpadayon pa ang ilang imbestigasyon.  - BANAT NEWS