Linungkabay sa Talisay nikibra

CEBU, Philippines - Gipasidan-an sa kapolisan ang mga Talisaynon nga magbantay sa mga kawatan nga misiaw sa pagpanglungkab sa mga kabalayan ilabi na sa sulod sa mga subdivision.

Kini bisan nasikop na sa kapolisan ang pipila sa mga banggiitang manglungkabay sa maong siyudad, matud ni Chief Inspector Eddie Recamara, officer-in-charge sa Talisay City Police Station.

Hinuon ang tulis sulod sa mga sakyanan mikibra ning buwana sukad tukora ang usa ka police outpost duol sa tulay sa Mananga, barangay Tabunok, sa maong dakbayan.

Si Recamara nagkanayon nga sa milabay’ng buwan sa Hunyo mikapin sa napulo ka balay ang gilungkab sa wala hiilhing kawatan apan niining buwan sa Hulyo, mikunhod ang linungkabay human masikop sa kapolisan ang pipila sa mga banggiitang manglungkabay sa maong dakbayan.

Ang mga nasikop sa mga polis mao sila si Rodel Tabasa, 18; ug Joseph Salumag, 20; pulos taga sitio Hollow Blocks, sa barangay Lagtang sa nahisgutang siyudad. Matud ni Recamara nga ang ubang manglungkabay nga ilang nasikop kasagaran mga menor de edad hinungdan nga ila kining gitugyan sa Department of Social Welfare and Development (DSWD).

Midugang siya nga may mga manglungkabay nga mopasangil lang nga mamunit og basura apan maniid diay sa kabalayan kun may tawo ba o wala. Ang linungkabay sa kabalayan sa Talisay mao usay nasinatian sa mga taga lungsod sa Consolacion ug Liloan.

Miingon si SPO4 Remegio Elacion sa Liloan Police Station nga ang rumbo sa mga manglungkabay mao ang kabalayan sa dapit sa utlanan tali sa Consolacion ug Liloan.

Maoy hinungdan nga sama sa taga Talisay, giawhag usab ni Elacion ang mga molupyo sa Consolacion ug Liloan nga kinahanglang magmaigmat sa pagbantay sa ilang mga balay.

Dili angay pasagdan ang balay nga biyaang dili sirado ang mga bintana ug pultahan bisan sa panahon sa adlaw ug labaw sa tanan sa panahon sa kagabhion kay kasagaran mao kini makapadani sa mga kawatan sa pagsulod aron makapangawat.  - BANAT NEWS