Cop killer nadakpan

CEBU, Philippines - Human sa upat ka buwan nga pagtago-tago nasikop na gyud sa kapolisan ang usa sa tulo ka suspetsadong tulisan kinsa mipusil patay kang PO1 William Mangubat Jr. diha ilawom sa Mananga Bridge sa dakbayan sa Talisay niadtong bulan sa Marso 11 ning tuiga.

 Kahinumduman nga si Mangubat miresponde sa tulis sa pasaheroan diha sa sitio Mananga niadtong buwan sa Marso niining tuiga apan gidemalas ang maong polis tungod kay siya maoy napusilan ug napatay.

Kagahapon sa buntag si Noel Simbajon alyas “Noel Pacaña”, 29, taga sitio Mananga, barangay Tabunok, Talisay nasikop sa hiniusang operasyon sa kapolisan sa Tangub City, Misamis Oriental ug kapolisan sa Talisay.

Si Simbajon nasikop pinasikad sa warrant of arrest sa kasong robbery with homicide nga giluwatan ni Regional Trial Court (RTC) Judge Gilbert Moises sa Branch 18 atol sa gipahigayong checkpoint sa kapolisan sa Tangub City.

Apan ang giingong duha ka kauban ni Simbajon nga sila si Lito Oros ug Jundee Oros parehong taga Mananga usab padayon pang gipangita.

Si Simbajon kinsa maoy giingong mipusil kang Mangubat niadtong Marso nagsakay og habal-habal paingon unta ngadto sa barangay Bintana diin siya magtago gipara sa mga polis nga nag-checkpoint.

Ang suspetsado giingong didto magpuyo sa iyang iyaan nga si Merdiza Campilan ug Rhodora Managing.

Si Chief Inspector Eddie Recamara, officer-in-charge sa Talisay City Police Station nagkanayon nga nakadawat sila og report nga si Simbajon nagtago sa Tangub City hinungdan nga nagpadala siya og hulagway sa suspetsado pinaagi sa electronic mail (email) ngadto sa Tangub City Police Station ug nakig-ayuda sa hepe sa kapolisan sa maong siyudad nga si Senior Inspector Elias Hampac.

Si Recamara nagkanayon usab nga human sa insidente si Simbajon mitago diha sa sitio Iba, barangay Lagtang diha sa balay ni Rodel Cunas.

Niadtong Marso 15, 2011 ang suspetsado misakay og Ceres bus paingon ngadto sa Negros Oriental dayon ngadto sa Misamis.

Si Recamara midugang nga sulod sa duha ka semanang gipanid-an sa kapolisan sa Tangub si Simbajon.  (FREEMAN)