Customs Police may bag-ong kumander

CEBU, Philippines - Pormal nang milingkod kagahapon ang bag-ong Cebu District Commander sa Customs Police human gipalagpot ang kanhing Commander ngadto sa dakbayan sa Customs Port of Davao.

Si Capt. Isidro Estrera nga maoy District Commander sa Customs Police sa Customs Port of Cagayan de Oro City maoy bag-ong milingkod sa Cebu Customs Police District.

Base sa Customs Personnel Order No. 303-2011 nga giluwatan ni BOC Commissioner Angelito Alvarez niadtong Hunyo 15, 2011 si kanhi Cebu District Commander Capt. Jerry Arizabal gibalhin ngadto sa Port of Davao, samtang si Maj. Camilo Cascolan ang District Commander sa Port of Davao gibalhin ngadto sa Port of Cagayan de Oro nga kanhing gihuptan ni Capt. Estrera.

Nasayran sa Banat News nga si Capt. Estrera ikatulo na ka higayon nga nahimong District Commander sa Cebu Customs Police sa panahon ni Collector Atty. Lourdes Mangaoang ug Collector Ricardo Belmonte diin mihimo kini og impresibong kalampusan sa pagmonitor sa illegal smuggling sa Sugbo nga ipaagi sa Cebu International Port o CIP hinungdan nga gidawat kini ni Cebu Customs District Collector Ronnie Silvestre niadtong Hunyo 24, 2011.

Matud pa ni Estrera nga nag-una sa iyang mga gimbuhaton mao ang pagsumpo sa illegal nga pagpalusot sa mga kargamento ug pagdakop niini aron mataral sa hukmanan ang mga smuggler.

Kahinumdoman nga gumikan sa issue sa “Black Fan Sea Corral” nga balor og P15 milyones nga gikompiskar nila ni Capt. Arizabal ug mga kaubanan sa milabay’ng semana apan gidudahang wala kini modawat og suborno, maoy hinungdan nga siya gipalagpot sa iyang katungdanan. (BANAT NEWS)