Tagbalay gigaid sa mga kawatan

CEBU, Philippines - Mga mahalong butang ug kwarta nasakiyo sa mga kawatan gikan sa usa ka balay human wala makabantay sa ilang pagsulod ang tag-iya niini kinsa nahinanok sa pagkatulog niadtong Martes sa kadlawon diha sa barangay Panuypoy, lungsod sa Consolacion.

Ang biktima mao si Dolores Ople, 47-anyos, biyuda ug mga anak niini nga sila si Sherly Ople ug Lizel Ople pulos hingkod ang panuigon mga molupyo sa nahisgutang lugar.

Si PO3 Allen Garciano sa Consolacion Police Station nga nahinabi sa Banat News mibutyag nga duha ka mga lalaki kinsa sakay og motorsiklo ang gitumbok nga responsable sa maong pagpanglungkab.

Ang mga butang nga nasakiyo naglangkub sa duha ka laptop nga mikantidad og P60 mil, upat ka cellular phone, OR ug CR sa motorsiklo ug tulo ka ATM card nga gipanag-iya ni Lizel. Si Sherly nawagtangan usab sa iyang pitaka nga dunay sulod nga P2 mil ug ¥5 mil (Yen), ingon man ang duha ka digital camera ug relo nga Seiko nga mikantidad og P4 mil ug mga importanting dokumento.

Si Garciano nagkanayon usab nga nangatulog ang mga biktima diha sa ilang payag sa gawas nga bahin sa ilang balay sulod sa compound tungod kay padayon pa ang renovation sa ilang balay ug wala kini makabantay nga nagmaneho usab og sulod sa ilang pinuy-anan ang mga kawatan.

Gitiunan og pusil sa duha ka mga kawatan ang igsuon nga lalaki  sa mga biktima nga si Arjun Ople, hingkod ang panuigon.

Si Arjun kinsa gigapos usab sa mga kawatan mao ray nahibilin diha sa sulod sa balay niadtong higayona dihang nakasulod ang mga kawatan.

Sa wala pa mosibat ang mga kawatan giguba una nila ang wiring sa motorsiklo sa mga biktima aron dili sila magukod.

Ang nahisgutang mga kawatan mipaingon ngadto sa barangay Polog sa nahisgutang lungsod.

Si Arjun nagsinggit-singgit dihang nakasibat na ang mga kawatan aron makamata ang iyang mga igsuon ug inahan nga diha sa payag.

Ang kapolisan padayon sa ilang follow-up investigation sa maong insidente. (BB)(BANAT NEWS)