Bana nga nagmahay sa asawa naghikog

CEBU, Philippines -  Patay na nga napalgan sa iyang asawa ang usa ka bana kinsa naghikog niadtong Martes sa buntag diha sulod sa ilang balay sa barangay Tugbangan, lungsod sa Consolacion.

Ang naghikog mao si Jomar Tabaco-an, 42-anyos, residente sa maong dapit ug giingong walay permanenteng trabaho.

Si PO1 Cilber Areglo sa Consolacion Police Station mibutyag sa Banat News nga duna silay na-recover nga suicide note gikan sa posisyon sa patay’ng lawas ni Tabaco-an.

Matud ni Areglo nga nabutang sa maong suicide note ang pagmahay ni Tabaco-an ngadto sa iyang asawa nga nagkanayon “pasaylo-a ku ninyo, nagmahay ku nimo beh”.

Ang maong polis nagkanayon nga gitumbok sa suicide note ang pagmahay ni Tabaco-an tungod sa pagpanarbaho sa iyang asawa nga si Carmelita isip yaya sa anak sa ilang silingan ug gamay na lang ang panahon niini sa pag-atiman sa kaugalingon nilang pamilya.

Si Areglo midugang nga nianang pagkagabii sa wala pa mahitabo ang insidente ang magtiayon nagdungan pa kini og pangatulog apan mao na lay namat-an ni Carmelita sayo sa buntag pagkasunod adlaw nga ang iyang bana nagbitay na diha sulod sa balay diin ang liog niini duna nay pisi nga higot ug ang pikas tumoy gihigot ngadto sa ibabaw’ng bahin sa kesame (BANAT NEWS)