'Nanuyop'kasohan karong adlawa
CEBU, Philippines - Gikatakda karong adlawa (Lunes) ang pagpasaka sa kaso diha sa Talisay City Prosecutor’s Office batok sa 11 ka mga tawo kinsa gipasanginlang nag-pot-session nga nadakpan sa gipahigayong saturation drive sa kapolisan diha sa sitio Magay, barangay Tanke, dakbayan sa Talisay niadtong Sabado sa buntag.
Si Chief Inspector Eddie Recamara, officer-in-charge sa Talisay City Police Station sa pakighinabi niini sa Banat News nagkanayon nga ilang kasuhan sila si Camelo Abapo ug Anecita Guisihan, mag-atubang og kasong kalapasan sa Section 6 ug 15 sa Akta Republika 9165 kun “Comprehensive Dangerous Drugs Act Law” tungod sa pag-operate og drug den. Ang Section 6 mao ang “maintenance of a den, dive or resort” diin bisan kinsa nga nag-maintain og den, dive o resort diin dunay nalambigit nga kalihukan kabahin sa ginadiling drugas dunay silot nga pagkabilanggo sa tibuok kinabuhi ug pabayaron og multa nga gikan sa P500 mil ngadto sa P10 milyones.
Si Abapo ug Guisihan giingong naaktohan usab sa mga polis nga miapil og gamit og ginadiling drugas hinungdan nga apilon sila sa kasong kalapasan sa Section 15 nga mao ang “use of dangerous drugs.”
Samtang ang mga migamit sa suyopanan nga sila si Ronnel Abapo, Jolito Ibonalo, Jessie Apolonio, Marvin Abella, Rennie Emnas, Darwin Mangaron ug Jason Secretaria mag-atubang sa kasong kalapasan sa Section 15 ug Section 12.
Ang 35-anyos nga inahan ug ang 16-anyos niining anak nga babaye ang mag-atubang usab og kasong kalapasan sa Section 15. Gipasabot ni Recamara nga ang menor 15-anyos pataas pwede na kining mapasakaan og kaso.
Hinuon ang nahisgutang menor gi-turnover sa mga polis ngadto sa City Social Welfare sa Talisay. (BANAT NEWS)
- Latest
- Trending