Ex-brgy kap imbitahon sa CCPO

CEBU, Philippines - Imbitahon sa kapulisan karung sunod semana ang kanhi kapitan sa barangay Kinawahan sa lungsod sa San Remegio aron sukit-sukiton may labot sa nahitabong pagpamusil nga mikalas og duha ka tawo ug miangol sa usa ka babaye niadtong Huwebes sa hapon diha sa sitio Kalubihan sa barangay Talamban.

Si SPO4 Rey Cuyos sa Homicide Section sa Cebu City Police Office (CCPO) nga nahinabi sa Banat News nagkanayon nga ilang adtuon karung Domingo si Susan Collamat nga kanhi asawa sa usa sa gipatay nga si Randy Librando ug maoy gidudahan sa pamilya sa gipatay.

Lakip sa napatay mao si Dioscoro Abendan ug naangol usab si Thelma Ygot nga igsuon ni Abendan.Si Ygot gipakigkitaan na nila ni Cuyos sa North General Hospital diin kini nalandig tungod sa tapsing nga samad pinusilan sa walang liog ug kilid sa lawas.

Si PO3 Wetzel Berry laing imbestigador sa maong kaso nagkanayon gawas sa habig sa kanhi magtiayong Librando ug Collamat ilaha usab gisubay ang sa habig ni Ygot.

Buot nilang susihon ngadto sa National Bilibid Prison sa Muntinlupa kun nakagawas na ang kanhi drayber ni Ygot nga maoy mipusil patay sa bana ni Ygot kaniadto.

Hangtud karun love triangle ang pabiling gisubay sa kapulisan sa ilang nagpadayon nga imbestigasyon. (BANAT NEWS)