Siete anyos nga batang babaye pasidunggan

CEBU, Philippines - Gitinguha karon ang City Social Welfare and Services Office (CSWSO) sa dakbayan sa Mandaue nga mohimo og lakang ang konseho sa barangay sa Tawason ug konseho sa dakbayan sa Mandaue aron kahatagan og pasidungog ang siete anyos nga batang babaye kinsa misalbar sa iyang mga manghod gikan sa nasunog nilang balay sa barangay Tawason sa miaging semana.

Kini tungod sa kabayanihon sa buhat ni Christina Salvador, 7, kinsa nagpakita sa iyang kaisog ug katakos sa pagluwas sa walo pa ka bulan niyang manghod ug lain pang duha, busa wala kini mahilakip sa pagkaugdaw sa ilang balay.

Sa nasayran gikan sa kabomberohan nga si Christina didto sa sulod sa ilang balay uban sa iyang mga manghod diin ang kamanghurang walo ka buwan natulog pa niadtong higayona dihang miulbo ang sunog.

Dihang miulbo na ang kayo gialsa ni Christina ang natulog niyang manghod ug giguyod pa ang laing duha ka manghod dayong gawas   gikan sa ilang balay nga gisugdan na og habhab  sa kayo.

Si Maricel Yu nga maoy senior social worker officer sa CSWSO sa Mandaue miingon nga iyang buhatan og report ang maong insidente nga maoy basehan sa rekomendasyon sa konseho sa dakbayan sa paghatag og pasidungog sa usa ka bayaning bata. (BANAT NEWS)