Comendador gianognan ni Giangan

CEBU, Philippines - Nadismaya ang pangulo sa kapulisan sa probinsya sa kalit nga pag-resign sa hepe sa kapulisan sa lungsod sa Compostela nga si Sr. Insp. Rodrigo Giangan.

Si Sr. Supt. Patrocinio Comendador nagkanayon sa mga tigbalita nga iyaha pang gipugngan si Giangan nga dili mo-resign isip hepe sa kapulisan sa Compostela apan wala kini maminaw kaniya tungod sa rason niini nga na-pressure human sa tensyon nga mitumaw niadtong Miyerkules ug Huwebes sa miaging semana nga pugsanong gisulod sa kampo ni mayor-elect Joel Quiño ang munisipyo sa naasoy’ng lungsod. Si Comendador mipasalig hinuon nga karung semanaha posibleng duna siya’y ikapuli kang Giangan apan sa pagkakarun magpabilin lang una sa naasoy’ng lungsod ang maong opisyal.

Apan matud ni Comendador nga anaa sa PNP General Orders no. 5 nga ang usa ka opisyal nga ibutang sa usa ka posisyon ‘never quit’ kini tungod kay kun dunay masugatang problema sa iyang posisyon anha mahibaw-an kun unsa ka maayo mangita’g paagi sa usa ka opisyal nga masulbad niini ang problema.

Matud ni Comendador wala pa niya mabasa ang resignation letter ni Giangan.

“Ang usa ka hepe dili gyud na mo-resign. Kinahanglan lig-on ka og kasingkasing,”

Gani iya pang gitambagan si Giangan nga magpabilin sa maong lungsod kay iyang nakita nga kugihan kini sa trabaho base sa iyang pagkaila niini kaniadto pa. Hinuon siya misabot kang Giangan sa pressure nga nasinati niini sanglit nakadawat siya og taho nga posibleng adunay laing protesta nga himuon ang mga supporters ni Quiño karung pipila ka adlaw.

Kini higayon nga moabot na ang desisyon gikan sa Commission on Elections (Comelec) Manila may labot sa gisang-at nga petisyon ni kanhi Mayor Ritchie Wagas human sa milabay’ng piniliay. (BANAT NEWS)