Pinusilay sa disko upat naangol

CEBU, Philippines -  Upat ang naangol apil na ang tulo ka mga batan-on nga mandiskohay dihang giingong nakigpinusilay sa mga polis ang usa ka lalaking armado nga nakakita og away sulod sa diskohan atol sa kapistahan sa barangay Candaguit lungsod sa Sibonga kagahapon sa ala 1:20 sa kaadlawon.

Ang mga biktima mao sila si Jefferd Sarda, 25, Ricky Llanos,37, ug usa ka 13-anyos nga taga barangay Mangyan, Sibonga.

Samtang ang polis nga nakigpinusilay sa armadong lalaki sulod sa diskohan mao si PO2 Elrey Brady Alegado, 32, nadestino sa Regional Public Safety Battalion (RPSB-7) sa Sibonga ug molupyo ra usab sa maong lugar.

Samtang ang suspek nga maoy gitumbok nga nanguna og pusil sa mirespondeng si Alegado nailhan nga si Felito Campana, 27, taga barangay Tungkil lungsod sa Minglanilla.

Matud ni PO3 Ederlino Bacusmo sa Sibonga Police dihang nahinabi sa Banat News subay sa imbestigasyon ang mga biktima apil na ang suspek nagsayaw sulod sa diskohan dihang miulbo ang komosyon tali sa mga batan-on ug nag-rambol.

Si Alegado nga molupyo sa maong lugar ug diha nianang tungura misulod ug gibadlong ang nagrambol ug gidala sila sa gawas ug gipapauli. Apil sa mibadlong sa kagubot mao si PO3 Nicholas Abapo nadestino sa Sibonga Police ug apil sa nagbantay sa maong disco.

Apan dangtan pila ka gutlo subling miulbo ang karambola sa sulod hinungdan nga mibalik og badlong si Alegado apan niining higayuna ang suspek mibunot sa iyang armas ug gipusil ang polis apan wala makaigo.

Tungod niini mibawos si Alegado og pusil sa suspek apan wala sad maigo hangtud nga misangpot kini sa pagbawos-bawos nila og pusil ug maoy nakapagan sa mga biktima.

Si Sarda, Llanos ug Recopelacion pulos kini nakaangkon og samad pinusilan sa lain laing bahin sa ilang lawas ug daling gihatud sa Carcar District Hospital.

Ang mga mirespondeng polis naka-recover og 11 ka kabhang sa bala sa kalibre .9mm nga pistola sa crime scene.

Daling gilusad ang hot pursuit operation uban si Alegado apan ilang nasayran nga nadala kini sa tambalanan dinhi sa dakbayan ug may samad pinusilan sa lawas.

Si Alegado gipaubos sa camp restriction samtang nagpadayon ang imbestigasyon sa maong insidente. (BANAT NEWS)