Usa sa duha ka carnapper tiklo

CEBU, Philippines - Nasikop sa kapolisan ang usa sa duha ka mga carnapper nga de motor atubangan sa Cebu International Convention Center (CICC) sa dakbayan sa Mandaue sa miaging gabii.

Ang nadakpan mao si Philip Gubalani Gaviola, 19, ulitawo nga taga Felicitas Village sa sitio Baybayon sa barangay Looc sa maong dakbayan, samtang ang kauban niyang nakaikyas giila sa kapolisan nga usa ka John Jade.

Si SPO2 Gerson Rosendo sa kapolisan sa Mandaue City Police Office (MCPO) mibutyag sa Banat News nga ilang nasigpatan ang duha ka mga suspetsado nga nagsakay og motorsiklo busa ila kining   gimandoan sa pagpahunong.

Apan matud pa ni SPO2 Rosendo, nga imbis mohunong, mipasutoy hinoon og padagan sa iyang motor hinungdan nga gigukod kini sa kapolisan gikan sa sitio Superior sa barangay Looc hangtod ngadto sa atubangan sa may CICC.

Midugang si SPO2 Rosendo nga gisiguro nila pagsikop si Gaviola nga maoy nagmaneho sa Yamaha Crypton nga color pula nga nagdala sa plate number nga MC 6964 .

Apan ang kauban niini nga si Jade mikabad og dagan hinungdan nga wala na hiapsi sa kapolisan.

Nasuta sa kapolisan nga ang motor nga gisakyan sa duha ka suspetsado gipanag-iya ni Nelson Matusan, 46, nga taga Marilyn Campano Dental Clinic compound sa barangay Cambaro sa maong dakbayan.

Ang suspetsado kinsa gitanggong karon sa detention cell sa Presinto 5 sa Opao Police Station nag-atubang sa kasong carnapping. (BANATNEWS)