33-anyos gipatay sulod sa balay

CEBU, Philippines - Napalgang patay ang usa ka 33-anyos nga lalaki sulod sa iyang payag ug dunay samad pinusilan sa iyang ulo kagahapon sa tungang gabii diha sa sitio Balisong sa barangay Guba siyudad sa Sugbu.

Ang biktima giila sa Homicide Section nga mao si Jonell Oporto, 33, molupyo sa nahisgutang lugar.

Si Juanit Velasco, 68, amahan sa biktima maoy mi-report sa barangay hall ug si SPO2 Jenerando Villaban kinsa maoy unang miresponde sa dapit mibutyag nga naghigda na sa salog sa iyang payag ug may samad pinusilan sa luyong bahin sa iyang ulo si Oporto.

Ang mga sakop sa Crime Scene Investigation Unit (CSIU) sa Cebu City Police Office nakakuha og usa ka kabhang sa kalibre .45 nga pistola.

Ang amahan mitug-an kang SPO4 Rey Cuyos ug mga kaubanan sa Homicide Section nga gikan siya sa usa niya ka anak nga si Joel nga nagpuyo sa barangay Talamban ug sa iyang pagbalik iya nang nakit-an ang biktima nga patay na.

Ang kapulisan blangko pa sa motibo sa krimen sanglit wala pa silay saksi nga nakuha aron mobarog sa krimen aron mailhan ang responsable.(EIM)