Mga testigos sa Pique case gihasi-Comendador

CEBU, Philippines - Nahasi ang mga testigos sa kaso may labot sa kamatayon ni Ellah Joy Pique sumala pa ni Sr. Supt. Patrocinio Comendador, Officer in Charge (OIC) sa Cebu Provincial Police Office (CPPO).

Matud pa ni Comendador nga nakadawat siya og reports nga ang witnesses sa lungsod sa Minglanilla gihasi tungod sa giingong pag-anha sa ila sa mga private investigators nga gidudahang gisuholan sa kampo ni Bella Ruby Santos nga maoy gipasakaan og kaso uban sa iyang uyab nga Briton nga si Ian Charles Griffiths sa maong krimen.

Ang giingong private investigators nangangkong mga sakop sa National Police Commission (Napolcom) ug sa Human Rights Commission.

Si Comendador nagkanayon nga iyang gi-welcome ang gihimo sa depensa apan wala nay mopatigbabaw pa sa balaod bisan kun migamit sila sa ngalan sa eligible government agencies.

“What they did is to harass the witnesses,” matud pang Comendador kinsa wala na mohatag pa og dugang detalye sa maong insidente.

Ang Philippine National Police (PNP) mipadayag nga nabalaka sila niini apan ilang gipasalig nga ang ilang mga saksi gihatagan nila og saktong seguridad ingon man protection.

“If they want it, it should be done properly not kamangon nila ang witnesses,” ingon pa ni Comendador ngadto sa mga sakop sa media.

Ang tulo ka private investigators giingong maoy miharas sa ilang mga saksi, ug ilaha na silang nailhan.

“Karon pa ko, a private investigator makes investigation nga ang kaso na-file na?” dugang pa niya nga kinahanglan unta nga mipahibawo o ba kaha nananghid gikan sa PNP sa dili pa sila (private investigator) makigkita sa ilang mga saksi.

Nagduda hinuon si Comendador nga ang maong mga imbestigador nagplanong moguba sa kredibilidad sa Task Force Ellah Joy.

Ang task force magtigom karung pipila ka adlaw aron hisgutan ang posibleng pagpasaka og kasong obstruction of justice batok sa nagpailang mga private investigators.

Desperate moves

‘Desperate moves ni sa pikas, knowing nga vulnerable ang witnesses that’s why we have to source them,” dugang pa niya.

Ang task force gilangkuban sa PNP, National Bureau of Investigation, Criminal Investigation and Detection Group, Bureau of Immigration ug PNP Crime Laboratory.

‘Blackmail to the  highest level’

Samtang gihulagway ni Comendador ang kasong perjury nga gisang-at sa kampo ni Santos batok kanila ingon man sa mga testigos tungod sa pasangil nga namakak sila sa ilang mga testimonya.

“I call it blackmail to the highest level,” matud pang Comendador ug midugang nga wala sila mahadlok niini apan siya miklarong katungod kini sa mga akusado.

Matud pang Comendador adunay gagmay’ng inconsistencies ang ilang mga pamahayag sa ilang testigos apan gipaniguro nilang ang ‘fact’ sa kaso naa.

“There are slight inconsistencies with their statements but we make sure that generally the fact is there. Too perfect stories are too good to be true na na,” pasabot pang Comendador.

Sa reklamo sa kampo ni Santos sila mipasangil sa duha ka testigo nga namakak tungod kay walay poste ug ngitngit ang lugar diin giingong ilang nakit-an ang paglabay diha sa Barili.

Bella emosyonal

Atol sa hearing sa motion to quash search warrant diha sa sala ni RTC Judge Meinrado Paredes, emosyonal nga mitubag si Santos dihang gi-cross examine sa iyang abogado nga si Atty. Ana Luz Crystal.

Kini dihang gipangutana kung unsay iyang gibati dihang iyang nasayran nga gi-ronda sa kapolisan ang iyang balay, matud pa ni Bella nga nasakitan siya og maayo ug daw gilapas sa mga polis ang iyang pribadong kinabuhi ug katungod.

Diha sa balay ni Santos nakuha ang mga sex toys, habol nga lama sa gituohang dugo, mga child pornography DVDs lakip na ang sakyanan nga Mitsubishi Pajero.

Gihulagway sa abogado ni Santos nga ang tanang nakuhang ebidensya sa kapolisan pulos walay kalabutan sa kidnapping ug sa pagpatay kang Pique.

Samtang si Paredes miingon atol sa argumento, ang mga testimonya sa mga testigos dili matawag nga ‘hearsay’ o tumo-tumo sanglit base sa ilang testimonya diha gyud sila sa lugar. (Rey Pasaporte ug Lesley Caminade /EIM) - BANAT NEWS