Graduation programs gisaway

CEBU, Philippines - Gisaway ni Bise Mayor Joy Augustus Young ang kopya sa mga gipang-printa nga graduation programs nga gihan-ay sa baga kaayo nga papel sa nagkadaiyang publikong eskwelahan sa dakbayan sa Sugbo gumikan kay tataw nga nag-usik-usik lang kini sa salapi.

Nagkanayon ang bise mayor nga dili na kinahanglan nga ibutang pa sa graduation program ang mga pangalan sa mga Department of Education-National Officials gumikan kay nagkalas lang kini og papel ug midako usab samot ang mga bayranan sa mga tinun-an.

Nahibulong usab siya nga dunay mga mensahe nga gipangplastar ni DepEd secretary Armin Luistro.

“Unsa na siya (Luistro), modagan na siya og senador?. Duna pu’y page nga hasta ang pangalan sa DepEd cashier kay giapil, para nako dili naman na importante. Okay raman gani nako nga dili nila iapil ang mga pangalan sa City Officials,” sumala pa sa bise mayor.

Sumala pa ni Young nga nangampanya karon pag-ayo ang DepEd nga mananom og mga kahoy apan subo kaayo palandungon nga dunay mga eskwelahan nga migamit og baga kaayo nga papel sa paghimo nila og graduation program.

“Buot huna-hunaon, ang papel gikan na sa kahoy,” nagkanayon si Young.

Dili usab uyon si Young sa mga tag-as kaayo nga mensahe atol sa graduation sanglit makalangan kini sa seremonya.

‘Ako gani, kay halos dili ko moestorya sa graduation ceremony, kay luoy intawon kaayo ang mga ginikanan nga nagpaabot sa gawas,” panapos pa ni Young. (EIM) (BANATNEWS)