Mograduwar sa Mandaue Central School libre ang toga

CEBU, Philippines - May libreng toga ang mga estudyante nga mograduwar sa Mandaue City Central School karong Abril isip hinabang sa mga miyembro sa Alumni sa maong tunghaan.

Matud pa ni Dr. Susana Cabahug ang Alumni President sa City Central School nga mipalit sila og 500 ka mga toga, aron ipasul-ob nga libre sa mga mograduwar matag tuig.

Miingon siya nga ang tagdumala na sa tulunghaan maoy mag-atiman ug mohipos niini aron nga matag gradwasyon dili na magkabuli-buli ang mga tinun-an ug ang mga ginikanan sa pagpangabang og toga nga isul-ob sa ilang pagpaso sa establado.

Karong Abril 3, 2011 ang unang hut-ong sa mga mograduwar nga mga tinun-an sa Grade 6 maoy unang makapahimulos sa pagsul-ob sa maong mga   toga.

Si Cabahug miingon nga ila kining gihimo tungod kay nasinatian nila ang kaapiki sa daghang mga ginikanan sa panahon sa gradwasyon sa ilang mga anak.

Ang maong proyekto sa City Central School Alumni sa dakbayan sa Mandaue gidayeg sa mga ginikanan kinsa sa samang higayon mapasalamaton kaayo ngadto sa mga opisyal nga nagpasiugda niini. (Bong Soriano ug Romeo T. Limpangog/WC)  (BANAT)