Nabungkag nga lawas nakit-an

CEBU, Philippines - Nabangalan sa mga divers sa barangay Agus sa dakbayan sa Lapulapu ang usa ka lawas sa tawo nga walay ulo, walay duha ka bukton ug kuwang og usa ka tiil nga gituohang iya sa lalaking nabuthan sa compressor diha sa barangay Punta Engaño sa milabay’ng gabii.

Matud pa ni SPO2 Ernesto Francisco ug PO1 Balaquia sa Homicide Section sa Lapulapu nga mga alas 3:45 sa milabay’ng hapon nakadawat sila og taho gikan sa usa ka grupo sa pribadong divers nga dunay ilang nakitang parte sa lawas sa usa ka tawo sa kadagatan sa sitio Balawis sa barangay Agus dakbayan sa Lapulapu.

Si Fernando Bertulfo sa Rolling Hills Funeral Homes mibutyag sa pakighinabi sa Banat News nga ang napalgang lawas wala nay walang paa samtang ang tuo nagpabilin pa apan wala na say tiil.

Niadtong milabay’ng Huwebes sa gabii miulbo ang gituohang improvised nga compressor sa pumpboat nga gi-angkorahe sa barangay Punta Engaño.

Namatay sa maong hitabo ang mananagat nga si Eugenio Daño nga usa ka mangingisda nga residente sa Pandanon, Bohol ug duha nalang ka mga kamot niini ang napalgan sa maong hitabo.

Girekomendar ni SPO2 Francisco nga ipaubos sa DNA testing ang maong mga parte sa lawas sa tawo aron masuta kung iya ba gyud kini ni Daño. (BANAT NEWS)