75-anyos nakuryentihan

CEBU, Philippines - Patay ang usa ka 75- anyos nga lola human kini aksidenting nakuryentihan sa live wire diha sa sulod sa ilang pinuy-anan sa barangay Tabunok sa lungsod sa Sogod niadtong Domingo sa alas 7:42 sa buntag.

Ang biktima nga patay nang nadangat sa tambalanan mao si Conception Lauron Banticil, nagpuyo sa nahisgutang lugar.

Matud ni PO3 Elymar Mendoza sa Sogod Police Station dihang nahinabi sa Banat News base imbestigasyon nag-repair sa sound system ang anak niini diha sa ilang balay.

Gituohang wala makabantay si Lauron sa live wire nga nagkutay diha sa ilang sala ug aksidente niya kining nahikapan ug nakuryentihan hinungdan nga nawad-an kini og panimuot.

Dali kining gidala sa Juan Dosado Memorial Medical Center sa lungsod apan gideklarar sa mga doktor nga patay na. ( EIM) - (BANAT NEWS)