Mga doktor nagtigom sa Sugbo

CEBU, Philippines - Dako ang kalipay ni Gobernador Gwendolyn Garcia nga gipili sa World Organization of Family Doctors ang Sugbo isip host sa ilang upat ka mga dagkong kalihukan nga gilangkoban sa 18th WONCA Regional Conference for Asia Pacific, 10th WONCA Rural Health World Conference, Philippine Academy of Family Physicians( PAFP) Golden Anniversary and Annual Convention ug 25th Anniversary of the Foundation Family Educators.

Gihulagway ni Garcia nga usa ka "histroic assembly" o makasaysayanong tigom kining nahitabo dinhi sa Sugbo nga nagsugod niadtong Domingo .

Gibutyag sa gobernador nga haum kaayo ang pagpahigayon ning maong tigom dinhi uban sa tema nga   “Paradigms of Family Medicine: Bridging Old traditions with New Concepts” .

Martud pa ni Garcia nga tukma kaayo ang maong tema sa baruganan sa simbahan ug sa mga dagkong mga opisyal sa Sugbo nga gipangulohan sa iyang buhatan nga nagsupak sa Reproductive Health Bill.

Mokabat sa 2 mil ka mga doktor ang mitambong sa pagbukas sa unang adlaw sa maong asembliya didto sa Waterfront Hotel nga gipangunahan pagtambong sa gobernador.

Lakip nga nanguna sa maong kalihukan mao ang presidente sa WONCA nga si Prof. Richard Roberts, WONCA Asia Pacific Regional president, Dr. Donald Li, WONCA Chief Executive Officer, Dr. Alfred Loh, PAFP National president, Sr. Soraya Abubakar, WONCA working party on rural health practice chair, Prof. Ian Couper, Family Medicine educators President, Dr. Josefina Educators, Philippine Medical Association president, Dr. Oscar Tinio, WONCA Asia Pacific Honorary secretary, Dr. Wahid Khan, Over-all Convention Chairman, Dr. Zorayda Leopando, Wess Fabb Orator, Prof. John Edward Murtagh, Wonca World Executives, Asia Pacific Executives and Council Members, PAFP National Board, chapter Presidents and Officers ug PAFP Board Examiners.

Niadtong Enero 31 usa ka courtesy call ang gibuhat ni PAFP Scientific Division Chair, Dr. Thelma Fernandez nga nakighinabi sa gobernador bahin sa pagpahigayon sa maong kalihukan dinhi     sa Sugbo.   - (BANAT NEWS)