Contractor gipusil sa mga tulisan patay

CEBU, Philippines - Usa ka contractor ang gipusil patay sa upat ka mga tulisan nga sakop sa Bloods gang human gitulis ang 13C nga nagbiyahian Talamban-Colon sa miaging alas 8:30 sa gabii diha sa Mindanao Avenue atubangan nga bahin sa Security Bank, sa Ayala Business Center sakop sa barangay Luz siyudad sa Sugbu.

Ang biktima giila nga mao si Roidito Roque Cabilao, 42, usa ka contractor sa Gala Industries ug residente sa Countryville Subdivision sa barangay Canduman siyudad sa Mandaue.

Ang upat ka tulisan nadakpan human usa kanila ang nadakpan sa police escort ni Mayor Michael Rama nga si PO1 Euller Matt Valmoria Merelos kinsa naatol nga nahiagi sa maong dapit. Sila mao si Joel Alutaya, 24; Jeward Sumalinog, 20; Jeffrey Frasco, 27, pulos mga taga sitio Negative sa barangay Carreta ug ang usa ka 16-anyos nga residente sa sitio San Jose sa barangay Luz.

Si Antonio Samson, 49, drayber sa gisakyan sa biktima ug ang konduktor niini nga si Rustico Teves, 27, miasoy sa mga imbestigador sa Homicide Section nga gikan sila sa Colon paingon na sa Talamban.

Ang mga tulisan misakay diha sa Chinese Cemetery sa barangay Carreta sa M..J. Cuenco Avenue ug pag-abot sa nahisgutang lugar kalit mibunot og wala matinong kalibre sa armas ug kutsilyo ug mideklarar nga tulis.

Ang tanang pasahero lakip na ang biktima nag-iyahay og ambak kilid sa PUJ apan kalit lang milanog ang usa ka buto sa armas ug si Cabilao maoy naigo.

Si Samson daling mipadagan sa iyang gimanehong PUJ paingon sa Talamban ug pagbalik niya una pa niya gi-report sa Parian Police Station ang nahitabo.

Si Cabilao nahiagom og samad pinusilan sa tuong dughan nga milapos sa luyo sa lawas ug patay na pag-abot sa Perpetual Soccour Hospital.

Si PO1 Merelos nga nahinabi sa Banat News mitug-an nga gikan sila sa Ayala diin ang mayor nangaon ug pagkahuman paingon sila sa Waterfront Hotel dihang iyang nasigpatan ang nagdinaganay nga mga tawo.

Si Alutaya maoy gitudlo sa mga pasahero nga usa sa mga tulisan maong iyang gidakop.

Si Alutaya mitug-an sa pangalan sa iyang mga kauban ug ang Theft and Robbery Section pinangulohan ni Chief Insp. Bonifacio Garciano sa gihimong follow-up operation kagahapon sa tungang gabii hangtud kagahapon sa buntag nakadakop sa 16-anyos, ug Frasco samtang si Sumalinog boluntaryong mitahan.

Ang upat miangkon nga sila maoy mitulis ug ang menor de edad miangkon nga siya maoy nakapusil sa biktima. (BANAT NEWS)