Gidunggab sa kadumot

CEBU, Philippines - Samdan sa tiyan ang usa ka tawo human kini dunggaba sa gituohan sa kapolisan nga kadumot niini didto sa barangay Basak, dakbayan sa Lapulapu sa miaging hapon.

Ang biktima mao si Rodrigo Lumongsod Ngujo, 46, minyo, nga taga Basak, samtang ang miluba kaniya nailhan lang sa angga nga Boboy, walay klarong address.

Si PO1 Franklin Bolaquia sa homicide section sa kapolisan sa maong dakbayan nga nahinabi sa Banat News miingon nga nagbarog lang ang biktima sa daplin sa dalan sa maong lugar dihang kalit lang mitumaw ang suspetsado ug sa walay estorya gihansakan og kalit ang tiyan sa biktima sa kutsilyo nga dala niini.

Ang biktima nga nakalitan wala kapanagang busa mitaop gyud ang kutsilyo sa iyang tiyan.

Matud pa ni PO1 Bolaquia nga nakasibat dayon pahilayo sa maong dapit ang maong suspetsado ug wala na kini maabti sa ilang mga kauban nga kapolisan sa maong dakbayan nga mitubag sa maong alarma.

Dugang pa ni PO1 Bolaquia nga nagtuo sila nga may panagdumot ang biktima ug ang suspetsado nga miresulta sa maong pagpanunggab. Gipangita pa sa kapolisan ang suspetsado. (BANAT NEWS)