Technician giluba sa tulisang de motor

CEBU, Philippines - Kritikal ang kahimtang sa usa ka cellphone technician human dunggaba sa armadong mga tawo nga mitulis kaniya didto sa sitio Timpolok, barangay Gun-ob, dakbayan sa Lapulapu sa miaging gabii.

Ang biktima mao si Franklin Alcontin Cahugot, 22, nga molupyo sa maong lugar kinsa gitulis sa upat ka wala hiilhing mga lalaki nga nagsakay og motorsiklo.

Si PO1 Franklin Bolaquia sa homicide section sa kapolisan sa maong dakbayan nga nahinabi sa Banat News miingon nga gikan pa sa iyang trabaho ang biktima ug naglakaw paingon sa ilang panimay.

Dihang kalit lamang kining gihunongan sa usa ka motorsiklo nga giluwanan sa mga tulisan dayon usa kanila ang miduol sa biktima uban sa pagtion sa kutsilyo ug mideklarar nga tulis.

Unya gibunlot ang bag nga gisambilay sa biktima apan wala kini ihatag sa naulahi kay buot mosukol apan gihansakan siya kalit sa kutsilyo ug giluba sa makadaghang higayon busa samdan siya sa nagkalainlaing bahin sa kalawasan.

Gidala dayon sa mga kabanay ang biktima ngadto sa Mactan Doctors Hospital ug padayon kining giatiman sa mga doktor sa maong tambalanan samtang padayon usab nga gipangita sa kapolisan ang mga tulisan.  (BANAT NEWS)