CIDG-7 nagtuong lig-on ang ebidensya vs. Ramirez

CEBU, Philippines - Gibarugan sa Criminal Investigation and Detection Group (CIDG)-7 nga lig-on ilang ebidensya batok kang Mayor Ricky Ramirez sa lungsod sa Medellin kinsa gipasakaan na og kasong homicide sa miaging semana sa piskaliya.

Si Sr. Supt. Ramon Rafael, hepe sa CIDG-7 nga nahinabi sa mga tigbalita nagkanayon nga dunay probable cause nganong ilang gipasaka ang maong kaso may labot sa pagkaigo sa lider sa ‘Mayor’s Squad’ niadtong Disyembre 27 nga si Edelberto “Delbi” Abao.

Si Rafael mitataw nga dili na siya mokomentaryo kun unsa may resulta sa gihimong imbestigasyon sa Department of Interior and Local Government (DILG)-7 kalabot sa maong hitabo.

Matud pa niini aduna silay tulo ka mga witnesses nga anak sa namatay, doktor ug ang laing usa pa, nga nagtumbok sa mayor nga maoy nakaigo kang Abao human mipusil sa iring ug ang bala niini didto mapunta sa paa sa biktima nga niadtong higayona matud pa natulog diha sa merkado. Gani usa ka saksi nga mitug-an pa ang biktima nga naigo siya sa bala sa armas sa mayor sa dihang gipusil niini ang iring.

Matud ni Rafael nga kasong homicide ang ilang gisang-at nga kaso batok kang Ramirez ug bahala na ang piskal niini pagtimbang-timbang.

Samtang sa report sa TV Patrol Central Visayas sa ABS-CBN kagahapon si Ramirez gikatahong mopasaka og kaso batok sa duha ka imbestigador sa CIDG-7 nga sila si PO3 Arnold Bocayong ug PO3 Angelito Yaun og kasong pagpangilkil ug pagpalagpot. - BANAT NEWS