Polis, asset gipamusil

CEBU, Philippines - Usa ka polis ug ang iyang ‘asset’ ang talandugon ang kahimtang human sila napusilan sa mga armadong mga lalaki dihang nagresponde og alarma sa barangay Pooc lungsod sa Sta. Fe isla sa Bantayan niadtong Miyerkules sa alas 9:20 sa gabii.

Talandugon ang kahimtang sulod sa tambalanan si SPO3 Julian Pasquite, molupyo sa barangay Ticad, Bantayan ug nadestino sa Bantayan Police Station ug ang habal-habal drayber nga si Reynaldo Giducos, 30, molupyo sa barangay Marikaban Sta. Fe.

Padayon pang gipangita sa kapolisan ang gikatahapang nagsul-ob og senina nga kolor orange, nagkarsones og maong ug nagkawo og kolor itom.

Matud ni PO2 Eric Illustrisimo, imbestigador sa Sta. Fe Police Station dihang nahinabi sa Banat News si Giducos gisakyan sa gikatahapan gikan sa merkado publiko sa Sta. Fe ug nagpahatud sa barangay Balidbid.

Samtang nagdagan ang motorsiklo nakamatikod si Giducos nga lain og tuyo kaniya ang iyang pasahero human niya mamatikding adunay laing motorsiklo nga nagsunod-sunod kanila. Pag-abot nila sa maong lugar nakit-an ni Giducos si SPO3 Pasquite nga diha sa KTV bar hinungdan nga iyahang gipahunong ang motorsiklo dayun nangayo og panabang sa polis.

Sumala pa nga si Pasquite miduol sa maong pasahero dungan sa pagpailang usa siya ka polis apan kalit lang mibunot ang gikatahapan og armas dayong pusil duha ka higayon kang Pasquite.

Si Pasquite nga igo rang nakapasalipod sa bungbong nga amakan naigo sa walang bahin sa dughan ug sa walang bahin sa paa.

Si Giducos pagkakita sa nahitabo naratol ug midagan apan mao na usab ang gipusil sa maong lalaki sa walang tiil. Human niini daling miikyas ang gikatahapan.

Ang mga biktima gihatud dayun sa Bantayan District Hospital apan gibalhin sa Vicente Sotto Memorial Medical Center (VSMMC) si Pasquite tungod sa talandugon nga kahimtang.

Ang mga imbestigador naka-recover og tulo ka kabhang sa basiyo sa bala sa kalibre .45 nga maoy gituohang gigamit sa mamumuno.

Si Chief Supt. Ager Ontog Jr.,director sa Police Regional Office-7 mimando na kang Sr. Supt. Erson Digal, direktor sa Cebu Provincial Police Office sa paghimo og imbestigasyon sa maong hitabo. (BANAT NEWS)