Joavan gimonitor sa polis

CEBU, Philippines - Ang sinagop sa mayor sa dakbayan sa Talisay higpit nga gi-monitor sa kapolisan sa siyudad ug matud ni Senior Inspector Errol Deveyra, Deputy sa Talisay City Police Station nga dili sila magduha-duha pagdakop kang Joavan Fernandez kung mobuhat na usab kini og laing kalapasan sa balaod.

Bisan og gidid-an na si Joavan sa pagsulod sa Vista Grande subdivision sa barangay Bulacao, Talisay apan gikatahong mianha gihapon kini sa Balay Alampoan nga nahimutang sa maong lugar.

Hinuon giingong mibiya usab dayon ang sinagop sa mayor dihang nakita niining adunay mga polis nga nag-roving sulod sa subdivision.

Si Deveyra nga nahinabi sa mga tigbalita kagahapon nagkanayon nga adunay mga polis nga gidestino sa sulod sa subdivision nga mag-roving ubos usab sa pagtugot sa mga molupyo sa maong dapit.

Matud ni Deveyra nga ipatuman nila ang balaod kung ugaling si Joavan maghimo og kalapasan ug karon ang sinagop sa mayor higpit nila nga gi-monitor.

Kahinumdoman nga bag-o lang miulbo ang laing isyu batok kang Joavan dihang gipasanginlan kini ni Raymund Paran, tindero sa tindahan nga nahimutang sa Club House sa subdivision nga gipanag-iya sa presidente sa mga homeowner nga si Ederlina Anderson.

Si Joavan giingong nasuko dihang nadugay og tunol ang biktima sa duha ka botilyang softdrinks tungod kay nagkaon kini niadtong higayona.

Apan ang maong mga pasangil gihimakak ni Joavan ug mipasangil kining si Paran usa ka sakop sa fraternity ug ang amo niining si Anderson maoy miinit kaniya.

Sa maong sitwasyon ang kapolisan mi-apply og search warrant batok kang Joavan ngadto sa korte.

Sa gipahigayong pagpangronda sa mga polis sa Balay Alampoan napunitan nila ang mga kahimanan sa paghingos og shabu ug mga gagmay’ng plastik nga pakete nga adunay abo sa shabu.

Si Joavan gipasakaan og kasong robbery tungod sa giingong pagkuha niini sa duha ka botelyang softdrinks nga walay bayad ug attempted homicide tungod sa giingong pagpabuto sa iyang armas paghadlok kang Paran ug kalapasan sa Akta Republika 9165 kon “Comprehesive Dangerous Drugs Act”. (BANAT)