P100 mil nga pabuto gisakmit

CEBU, Philippines - Mokabat sa P100 mil nga nagkalain-laing matang sa pabuto ang gisakmit ug gihumolan sa tubig sa Cebu City Market Authority gikan sa Carbon Public Market ug dalan Borromeo kagahapon.

Ang maong mga pabuto gisakmit tungod kay gibaligya sila sa mga dapit nga dili designated area sanglit sa South Reclamation Project ra maoy gitugot sa kagamhanan.

Samtang ang Talisay City Fire Bureau higpit nga nag-monitor sa mga mamaligyaay og pabuto sa maong dakbayan aron malikayan ang aksidente.

Si Talisay City Fire Marshal Felipe Canillas nga nahinabi sa Banat News kagahapon mibutyag nga ang mga tindahan ug mall sa siyudad wala nila hatagi og pagtugot nga makapamaligya og pabuto.

Niadtong miaging semana nagsugod na sila og roving sa mga mall sa siyudad ug ubang mga tindahan aron masuta kung wala ba kini mohimo og kalapasan.

Ang mga manindahay og pabuto gitugotan lang nga makaladlad sa ilang baligya sa mga gitudlo nga lugar alang niini nga mao ang barangay Lagtang.

Matud usab ni Canillas nga gitugot lamang nga sugod sa Disyembre 16 hangtud sa Disyembre 31, 2010 nga maoy mga adlaw nga makapamaligya og pabuto ang mga manindahay sa nahisgutang lugar.

Apan ang mga manindahay kinahanglan pang mokuha og mga permit to display nga anha nila malukat sa buhatan sa Fire Bureau sa siyudad nga may bayranang P100.

Unya mokuha pa sila og permit gikan sa Firearms Explosive Security Agency Guard Supervision (FESAGS) dayon mobalik na usab sila ngadto sa city hall aron mokuha og business permit.

Sukad niadtong Disyembre 16, 2010 wala pa makaabot og napulo ka mga manindahay og pabuto ang mikuha og permit.

Si Canillas nagkanayon nga kanunay silang nag-roving karon tungod kay usa sa ilang gibantayan mao ang mga ammulant vendor nga posibleng magdala-dala og hapag nga sudlan og pabuto ug   uban pang sudlanan nga isakay og traysikad.

Ang kapolisan moimbargo kutob sa masakpang pabuto nga iladlad gawas sa designated area nga mao ang Lagtang. (BANAT)