64 nga lolo milugos sa 8 anyos

CEBU, Philippines - Gipasaka na ang kaso batok sa usa ka 64 anyos nga lolo kinsa gipriso na sa kapolisan sa Ginatilan human kini dakpa sa kasong matud pa pagpanglugos og 8 anyos nga batang babaye nga iyang silingan didto sa barangay Poblacion, lungsod sa Ginatilan niadtong Biyernes sa udto.

Ang suspetsado giila lang sa ngalang Odong (dili tinuod niyang ngalan) 64, minyo, samtang gipugngan usab ang ngalan sa biktima.

Base sa inisyal nga imbistigasyon sa kapolisan sa Ginatilan, ilang nasayran nga sa kaudtohon niadtong Biyernes, nagduwa ang biktima kuyog sa iyang mga higala dihang gitawag kuno kini sa suspetsado dayon gihatagan og P20 nga kwarta ug usa ka putos nga biscuit.

Human kuno madawat sa bata ang kuwarta ug biscuit, gidala kuno kini sa suspetsado ngadto sa iyang balay ug didto gipanamastamasan ang biktima.

Midugang ang kapolisan nga niadto nang Lunes nadiskitahan sa mga ginikanan sa biktima ang nahitabo dihang mireklamo ang ilang anak nga nagsakit ang iyang kinatawo.

Dihang gisukit sa inahan, mitug-an kini nga gilugos siya sa suspetsado.

Gisumbong dayon sa mga ginikanan ngadto sa kapolisan sa lungsod ang maong hitabo ug diha-diha nasikop ang suspetsado ug gitanggong na karon sa prisohan.

Sa pakighinabi sa Banat News kang PO1 Michael Sevilla, sa Ginatilan Police Station kagahapon, mibutyag ang naulahi nga gipasakaan na nila og kaso ang suspetsado kinsa kasamtangang nagtingkagol sa ilang prisohan karon.  – BANAT NEWS