Nakapalit og lote gi-ambush

CEBU, Philippines - Usa ka Filipino-American ang kritikal human gi-ambush sa duha ka lalaki samtang laing usa ka lalaki ang gipatay sa manag-amahan sa managlahi nga oras ug lugar sa lalawigan sa Sugbo.

Pasado alas-10 buntag gipaulanan og bala si Mario Aquiatan, usa ka Fil-Am samtang kini naglakaw uban sa iyang pamilya diha sa barangay Vive lungsod sa Ronda.

Samtang ang suspetsado nailhan usab nga sila Ricky Sara ug Noriejen Anorico nga pulos molupyo sa maong lugar nga gituohang nasuko sa biktima kinsa mao nay bag-ong nanag-iya sa luna nga gipuy-an sa mga suspek.

Ang biktima naigo sa nagkadaiyang parte sa iyang lawas ug gidali usab kini pagdala sa Chong Hua Hospital.

Sa pakighinabi sa Banat News sa hepe sa kapolisan sa Ronda Police Chief Insp. Rogelio Amoroso si Aquiatan dual-citizen ug maoy nakapalit sa yuta nga gipuy-an sa pamilyang Sara.

Nasuta nga sa wala pa mahitabo ang pagpamusil gihangyo sa biktima ang inahan ni Sara nga papahawaon na sa maong yuta kini tungod kay iya nang gamiton ang luna.

Apan giingong mitumaw ang kainit sa maong panag-estorya ug maoy usa sa nakitang hinungdan sa pagpamusil ni Sara ngadto sa biktima.

Gihulagway usab ni Amoroso nga usa ka doktor sa gawas sa nasud ang biktima apan dili` palang kini dugay nga nabalik diri sa nasud.

Matud pa ni Amoroso nga ang biktima nakaangkon og samad pinusilan sa iyang dunggan ug giingong nalahos ngadto sa apapangig ug nakaangkon usab kini og samad pinusilan sa iyang buko-buko nga nalapos usab ngadto sa iyang tiyan. – BANAT NEWS