Loot mireklamo batok telecommunication company

CEBU, Philippines - Gireklamo ni Mayor Malou Loot sa Daanbantayan ang usa ka telecommunication company nga nagbase sa ilang lungsod kay matud pa nag-apil apil ug mipaluyo og mga kandidato sa milabay’ng barangay ug SK election kagahapon. Sa interview sa Bantay Radyo ,gipasanginlan ni Loot ang tulo ka sakyanan nga gihulagway niya nga opisyal nga mga sakyanan sa usa ka kompaniya sa telecommunication nga gigamit sa pagpanghakot og mga botante didto sa barangay Bateriya nga mga supporter sa kandidato nga kaatbang sa gipaluyohang kandidato sa mayor.Ang nasuspenso nga kapitan sa barangay Bateriya nga si Arsenio Luciano nagpasubli sa pagkakapitan atbang ni Samuel Damole, nga maoy gisuportahan sa mayor.

Matod ni Loot nga iyang ipatawag ang kadagkoan sa maong kompaniya (nga wala hinganli dinhi) human sa eleksiyon aron pangayoan og katin-awan sa maong pagpagamit sa mga sakyanan niini sa politikanhong kalihokan.

Laing option ni Loot mao ang pagduso og pormal nga reklamo ngadto sa kadagkoan sa maong telecommunication company.

Si Loot sa sayo pa mireklamo kang Gov. Gwen Garcia gumikan sa giingon niyang nag-apil apil usab sa piniliay sa ilang lungsod pinaagi sa pagsuporta og mga kandidato sa barangay nga iyang kaatbang .

Usa sa giingong kandidatong gipaluyohan sa gobernador mao si retired Col. Hiram Benatiro nga napildi pagka bise mayor sa milabay’ng eleksyon ug nagpapili pagka kapitan sa barangay Tapilon.

Si Loot ug Garcia wala nay maayong relasyon human sa giingong pagkasaba sa gobernador kang Loot.

Gisuwayan sa Banat News pagkuha og pamahayag si Garcia kalabot ning maong isyu

apan wala siya makontak. (BANATNEWS)