Milugos sa 8-anyos sikop

CEBU, Philippines - Gidakop sa kapulisan ang usa ka uyoan nga flower vendor human gipasanginlang miunay og lugos sa iyang 8-anyos nga pag-umangkong babaye diha sa barangay Poblacion siyudad sa Danao niadtong Biyernes sa alas 8:00 sa gabii.

Ang gidakop sa mga sakop sa Provincial Intelligence Branch (PIB) ug Special Reaction Unit (SRU) inabagan sa kapulisan sa Danao ang suspek (pangalan gipugngan sa Banat News) nga taga bukirang barangay sa Budlaan siyudad sa Sugbo ug flower vendor sa siyudad sa Danao.

Matud ni PO2 Marlon Remollo sa Danao City Police Station dihang nahinabi sa Banat News gidakop ang suspek samtang namaligya kini og mga buwak duol sa simbahan.

Ang kapolisan armado og warrant of arrest gikan ni Regional Trial Court (RTC) Judge Manuel Patalingjug tungod sa pasangil nga kini ang milugos sa maong bata sayong bahin ning tuiga.

Ang suspek gidala sa kapulisan ug gi-turnover sa Cebu City Police Office (CPPO) nga maoy may hurisdiksiyon sa maong kaso. (BANAT NEWS)