7 election officers reklamo vs Petalcorin

CEBU, Philippines - Pito ka mga municipal election officers sa Bohol ang misang-at og petisyon ngadto sa Commission on Elections en banc aron ipabalhin sa laing rehiyon ang kasamtangang acting regional director sa Comelec nga si Veronico Petalcorin.

Ang mga mipadala og suwat-hangyo mao ang mga election officers sa Bohol nga sila si Siegfried Saniel, election officer sa Panglao; Ma.Divina Gamutin sa Garcia Hernandez; Ester Escobilla sa Duero; Rolan Dominic Amora sa Guindulman; Gerardo Lofranco sa Balilihan; Rouel Alquizalas, Dimiao ug Eliseo Labaria, ang provincial election supervisor III sa Bohol.

Ang pito mibase sa ilang hangyo pagpalabay sa laing rehiyon kang Petalcorin sa reklamong ilang gipasaka niadto pang Pebrero 3, 2010 sa Law Department sa Comelec-Manila.

Ang reklamo sa pito may kalambigitan sa pasangil nila kang Petalcorin og coercion, intimidation ug bribery nga nahitabo niadtong 2007 national elections aron paboran ang usa ka administration partylist group.

Ang maong kaso giingong gipasaka sa maong mga opisyal human sila makabaton og kaisog pagsang-at niini niining bag-ohay lang ug nasugdan pagpahigayon sa preliminary investigation ug clarificatory hearing niadtong Abril 15, 2010 ug Hunyo 3,2010 ug gisumitir na ngadto Investigation and Prosecution Division kang investigating officer Maria Juana Valesa.

Tungod sa maong kaso ug sa posisyong gihuptan karon ni Petalcorin ang mga reklamante nagtuong makaimpluwensya kini sa kaso ug makahatag og kahadlok kanila.

Si Petalcorin dihang gikahinabi sa Banat News nagkanayon nga andam siyang mobalhin sa ubang lugar kun mandoan sa Comelec Manila apan siya mihulagway niini kun mahinayon man nga dili patas.

Sumala pa niya ang mga reklamante adunay kasuko kaniya dihang siya pay Provincial Comelec sa Bohol niadtong 2007 tungod sa iyang pagkurihir sa ilang mga sayop sa trabaho lakip na ang ilang pagpang-absent.  - BANAT NEWS