Coordinator sa masiao sikop

CEBU, Philippines - Usa ka gituohang coordinator sa masiao nasikop sa kapolisan didto sa dalan Tupaz, barangay Suba, dakbayan sa Danao sa miaging adlaw.

Ang suspetsado nailhan nga si Nolan Gorre, 52, nga taga Suba , kinsa nasakmitan og 249 ka tally sheet, 15 ka jai-alai tip sheet, 5 ka ball pen, 1 ka stapler, ug salapi nga mikabat sa P3,135 nga gituohang halin sa tiket sa masiao.

Ang pagkasikop sa suspetsado nahimo pinaagi sa usa ka search warrant nga giluwatan ni Judge Soliver Peras, ang presiding judge sa RTC Branch 19.

Ang team sa kapolisan nga mironda sa balay sa suspetsado gipangunahan ni P/Sr. Ins. Ricky Neron sa Danao Police Station.

Gawas sa masiao, ang uban pang mga illegal nga sugal nga gibantayan karon sa kapolisan mao ang hantak, video karera, tigbakay ug ang pagpaaway sa kaka sa mga tulunghaan.

Kini agi og pagtuman sa kamandoan sa Camp Crame kinsa gusto nga limpiyohan ang nasud gikan sa naghitak nga nagkalainlaing matang sa illegal nga sugal. – BANAT NEWS