Masiao operator monitoron - PNP

CEBU, Philippines - Ipasusi ni Police Regional Office (PRO)-7 director Ager Ontog ang report nga si boxing promoter Rex “Wakee” Salud nalambigit pa sa ilegal nga pagpadagan og masiao dinhi sa Sugbo ug ubang bahin sa Central Visayas.

Atol sa interview sa DyLA kagahapon, si Ontog wala mokonpirmar apan wala usab manghimakak nga ang ngalan ni Salud nalakip sa listahan sa kapin 40 ka mga tawo nga nag-operate og masiao dinhi.

Si Salud nga usa sa mga promoter ni boxing champion Manny Pacquiao gipasanginlan nga maoy “payong” sa tanang operators sa masiao sa Kabisay-an ingon man sa ubang bahin sa Mindanao.

Apan sa balita sa DyLA kagahapon, kusganong gipanghimakak ni Salud ang report nga nalambigit siya sa ilegal nga pagpadagan sa sugal nga masiao.

Pipila ka tuig na ang milabay, dunay balay sa barangay Guadalupe nga giingong giabangan ni Salud, gironda sa mga polis ug nakuhaan og kagamitan sa sugal nga masiao.

Apil sa nasakmit mao ang lista nga dunay ngalan sa pipila ka polis, apil na ang usa ka opisyal, nga tigdawatan og suborno gikan sa maisao operators.

Ang isyu sa masiao mibalik og kainit human si Lingayen—Dagupan Bishop-emeritus Oscar Cruz mipasangil nga dakong opisyal sa kagamhanan nalambigit isip protektor sa jueteng.

Si DILG Usec. Rico Puno ug ang hepe sa kapolisan sa nasud maoy gipasanginlan nga nagdawatan og suborno gikan sa mga tigpasiugda sa masiao aron dili hilabtan ang ilang kalihukan.

Dinhi sa dakbayan sa Sugbo, nabantayan nga ang kapolisan wala kaayo mohimo’g kampanya sa kalihukan sa mga masiao operators.

Ang dakbayan sa Sugbo dunay City Ordinance 1616 nga nagdili pag-imprinta, pagbaligya ug paghupot og masiao tipsheets, apan wala nila himoi og kampanya ang mga imprintahanan sa dalan Sikatuna nga nangimprinta og tipsheets sa masiao.

Matud ni Ontog nga kun sa ilang follow-up investigation makakuha sila og kamatuoran batok sa mga nalambigit sa masiao operation, dili sila magpanuko pagronda sa maong ilegal nga kalihukan.

Sa dakbayan sa Mandaue, nadakpan sa mga sakop sa Special Operations Group (SOG) sa Mandaue City Police Office (MCPO) ang gikatahapang masiao coordinator sa miaging gabii sa dalan Plaridel, barangay Cambaro, samtang 65-anyos nga usher nasikop sa sitio Superior, barangay Looc.

Si Felipe Cabaday, 52, nasakmitan og mga tally sheet, tip sheet, stub nga gisulatan sa nagkadaiyang kombinasyon sa numero.

Si Felipe Leciones, 65, naaktuhan sa nagpatrolyang kapolisan nga nangisyu ug nasakmitan kini og tally sheets, stub ug halin nga P120.

Nadakpan si Cabaday sa grupo ni Insp. Sosimo Ceniza Jabas Jr. sa Criminal Investigation and Intelligence Division (CIID) ug mga sakop sa SOG. - Rene Borromeo, Bong Soriano ug Romeo Limpangog (BANAT NEWS)