2 ka akyat bahay nasikop

CEBU, Philippines - Duha ka batan-ong gituhoang sakop sa akyat bahay gang nadakpan sa kapolisan sa dihang ilang gibiktima ang ilang silingan sa barangay Looc, dakbayan sa Mandaue.

Giila ni SPO1 Arnulfo Quiatchon ang mga dinakpan nga mao sila si Johnjet Biking, 18, ug Lactom Alondres, 18, nga pulos ulitawo ug molupyo sa nahisgotang lugar.

Si SPO1 Quiatchon miingon nga ang panimalay ni Roma Omandam sa Felicitas Village sa barangay Looc, Mandaue gisaka sa mga suspetsado ug gisakiyo ang digital camera, i-Pod nga nagkantidad og P60,000 ug salapi nga P3,000.

Matud pa ni SPO1 Quiatchon nga gilungkab sa duha ka suspetsado ang luyong pultahan sa biktima sa ikaduhang andana sa miaging kaadlawon nga ang nagpuyo sa maong panimalay nahinanok usab sa pagkatulog.

Sa follow-up nga ilang gihimo nasuta nga pipila sa mga silingan sa biktima nakamatikod sa paggawas sa mga suspetsado nga nagdala na sa maong mga butang gikan sa nahisgotang panimalay.

Matud pa ni SPO1 Quiatchon nga sa dihang ilang gidakop ang duha ug gisukitsukit ilang nabawi ang maong mga butang nga gibaligya na ug ang salapi nga ilang nasakiyo nahurot na pagpalit og shabu nga gisuyop sa barangay Pasil, dakbayan sa Sugbo.  – BANAT NEWS