Polis sa Talisay di mokiha sa nanghagit kanila

CEBU, Philippines - Ang mga polis nga gihagad og pinusilay sa kagawad sa barangay Lagtang, dakbayan sa Talisay dili moduso og kaso batok sa suspetsado.

Kahinumdoman nga sila si PO2 Amelito Hornales, PO1 Oliver Ortega ug PO1 Aquilles Cabando kinsa pulos nadestino sa traffic division sa Tabunok maoy giingong gihagad og pinusilay ni Kagawad Wilson Alferez sa milabay’ng adlaw.

Atol sa maong insidente si Alferez giingong hubog ug miadto sa buhatan sa traffic division aron magpa-blotter tungod kay giti-onan kini og pusil sa usa ka drayber nga iyang gikabangi sa trapiko apan ang maong insidente nahitabo didto sa lungsod sa Minglanilla.

Si Cabando mitambag kang Alferez nga adto magpa-blotter sa Minglanilla kay ang insidente didto man mahitabo, apan giingong mihiwasa sa kasuko ang maong kagawad ug mibuhi og dili maayong pulong ngadto sa mga polis ug nanghagad og pinusilay.

Si Hornales nga nahinabi sa Banat News nagkanayon nga wala na silay planong moduso og kaso batok kang Alferez.

Sayo niini si Kapitan Ronnie Cabuenas sa Lagtang ug si Alferez wala pa magkaestorya ug matud ni Cabuenas nga ipaubos una niya sa imbestigasyon ang maong kagawad una siya mohimo og aksiyon.

Ang Banat News mitawag sa barangay hall sa Lagtang aron makuhaan si Cabuenas og pamahayag sa buhaton niining aksiyon apan matud sa kalihim sa barangay nga si Renato Cabradilla nga wala pa gihapon magka-estorya ang kapitan ug ang kagawad. – BANAT NEWS