Nanghagis sa igsuon gipatay

CEBU, Philippines - Patay diha-diha ang usa ka mag-uuma human nayagyag ang ginhawaan human dihang giduslak og pinote sa iyang kaugalingong manghod diha sa barangay Butong sa lungsod sa Argao niadtong Biyernes sa alas 7:00 sa gabii.

Ang biktima nga wala gyud makaabot sa tambalanan mao si Rocerel Sambilad Betonta, 44, usa ka mag-uuma ug molupyo sa nahisgutang lugar samtang ang suspek mao si Erwin Sambilad, 26, manghud sa biktima ug nagpuyo gihapon sa maong lugar.

Matod ni PO2 Von Tecson sa Argao Police Station dihang nahinabi sa Banat News base sa imbestigasyon, gipangitaan sa biktima ang suspek sa nawagtang nga bala sa iyang shotgun.

Ang suspek mibutyag sa kapolisan nga niadtong tungura nagbarog siya sa pultahan sa balay mibalibad ug mitug-an nga wala siya makakita niini ug wala siya manghilabot.

Apan gikatahong nasuko ang biktima ngadto sa suspek ug giduslak niya sa sumbohan sa shotgun ang tiyan sa suspek hinungdan nga natumba ang suspek ug daling mikaratel og dagan.

Gikatahong pwerteng sukoa sa suspek ug gigukod niini ang manghod hangtud nga milipot sa luyo ang suspek agi sa kusina ug giibot ang ilang sundang ug mitago sa labong nga tanaman sa ilang okrahan.

Apan tungod sa kapungot sa biktima gikuha niini ang 5-anyos nga anak sa suspek ug gikugos samtang naggunit sa shotgun ang pikas kamot ug mipaatubang sa okrahan diin magtago ang suspek ug nagpunay og singgit sa pagpagawas sa suspek aron sila magtiwas og patay.

Sa kahadlok sa suspek nga siya mapusilan ug mapasipad-an ang iyang anak hinay-hinay kining mikamang paingon sa tungod nga bahin sa biktima kinsa niadtong tungura wala makamatikod sa presensya sa suspek.

Diha nalang kini nakabantay nga gikalitan siya og duslak sa pinote diha sa tiyan ug wala na makakablit pa sa iyang shotgun ug nahagba ug natagak sab ang gikugos nga bata.

Gisuwayan pa unta og hatud sa Isidro Kintanar Memorial Hospital sa lungsod ang biktima apan namatay gyud kini diha palang sa dalan hinungdan nga wala nalang kini ilahos sa hospital ug gibalik sa ilang balay.

Samtang ang suspek boluntaryong mitahan sa kapulisan ug andam moatubang sa kasong iyang atubangon, dugang nahipos nga impormasiyon sa kapulisan nga ang biktima kanunay nang manghagis ug mangita og away sa iyang pamilya sa higayon nga mahubog.

Wala hinuon matino kun hubog o nakainom ba niadtong tungura ang suspek.  (BANAT NEWS)