Gipusil ulo napaksit

CEBU, Philippines - Napaksit ang ulo sa usa ka 37 anyos nga lalaki dihang natapsingan kini sa bala gikan sa wala hiilhing mipusil kaniya samtang siya natulog sa sala sa ilang balay didto sa barangay Arpili lungsod sa Balamban niadtong Lunes sa alas 8:00 sa gabii.

Ang biktima mao si Nathaniel Artajo Capacite, 37, ulitawo, nga taga Arpili.

Si PO3 Celso Diaz sa Balamban Police Station mibutyag sa Banat News nga samtang ang biktima nahinanok sa pagkatulog sa ilang sala, may kriminal nga mihilom sa pagsaka unya giluthang siya. Ang mga tigpaniid nagkanayon nga malagmit nagkurog ang kamot sa maong kriminal nga nagkupot sa armas kay kun wala pa, malagmit mapisok gyud ang bagolbagol sa biktima.

Apan bisan pa niini talandugon kaayo ang kahimtang sa biktima nga gihatud ngadto sa Balamban District Hospital apan gibalhin kini ngadto sa Vicente Sotto Memorial Medical Center (VSMMC) sa dakbayan sa Sugbo.

Sa pagkakaron padayon pang gipanid-an sa kapolisan kung kinsay responsable sa pagpusil sa biktima.   - BANAT NEWS