Byron nanulong sa traffic group

CEBU, Philippines - Laing kontrobersya na usab ang nasugamakan sa igsuon sa gobernador sa lalawigan nga si kanhi Capitol consultant on security matters Byron Garcia human mosulong ug nakiglalis sa usa ka polis sa Cebu City Traffic Group.

Giingong nasuko si Garcia nga gidala ang iyang motorsiklo nga gimaneho sa iyang sakop nga si Filomeno Rodriguez diha sa buhatan sa City Traffic Office Management (Citom) human pasado alas-10 sa miaging gabii sa dalan V. Rama human dakpa sa checkpoint sa mga sakop sa San Nicolas Police Station.

Si Rodriguez gidakop tungod sa pagmaneho gamit lang ang student permit ug walay professional driver nga kauban.

Apan kalit nga miabot si Garcia ug nakiglalis ni SPO2 Preito Villahermosa tungod kay gustong kuhaon ni Garcia ang iyang motorsiklo ug mibahad nga mag-abot sila sa Korte Suprema kun gikinahanglan.

Nakapresentar hinuon si Garcia sa mga gipangitang papeles sama sa Certificate of Registration ug Official Receipt hinungdan nga gi-release ang motorsiklo.

Sa pakighinabi sa Banat News ni Chief Insp. Andres Bayarcal, hepe sa Traffic Group nga ang motorsiklo ni Garcia adunay plakang 7536-QR gi-safekeeping lamang tungod sa kalapasang driving without license ni Rodriguez.

Giklaro ni Bayarcal nga ang basehan sa ilang pagdala sa sakyanan ug pag-release mao ang City Ordinance 801 kon Traffic Ordinance of Cebu City nga may P500 multa kay wala silay impounding receipt niadtong tungora.

Si Garcia nga nahinabi sa Banat News mibutyag nga iyang gipangunayan sa pagkuha ang maong motor tungod kay wala man silay nahimong kalapasan sa trapiko.

Gani ang gibutang lang sa resibo mao lang nga ‘for safekeeping’ hinungdan nga iyang gikuha ang motorsiklo kay mas safety kun siya nalang mohipos niini.

Matud pang Garcia nga maong nagkalalis sila ni SPO2 Preito Villahermosa tungod kay giingong arogante kini maong iyang gipangitaan og rason nganong angayan nga i-impound ang maong sakyanan.

 Samtang ang Chairman sa CITOM nga si Sylvan Jakosalem nga nahinabi usab sa Banat News mibutyag nga ang duha ka habig walay kalapasang nabuhat apan nagkainitay lang.

Apan miingon si Jakosalem sa TV Patrol sa ABS-CBN nga patun-an sa ilang legal team ang posibleng kalapasan ni Garcia tungod sa agresibong pagkuha sa motor sa iyang tawo.  (BANATNEWS)