Pantalan tukoron sa Tuburan

CEBU, Philippines - Gitinguha ni Mayor Aljun Diamante sa lungsod sa Tuburan nga mahimong first class municipality ngadto na sa pagkahingpit nga usa ka siyudad sa ilang lungsod sa mosunod nga mga katuigan.

Kini kun hingpit nang makompleto ang iyang labing unang proyekto nga mao ang pagtukod og bag-ong pantalan aron mabuksan pagbalik ang mga biyahe sa mga bus pasaheroan tali sa lalawigan sa Sugbo ug ngadto sa Negros Occidental.

Ang maong pantalan sa lungsod gisirhan sa milabay’ng administrasyon hinungdan nga ang lungsod na sa Tabuelan maoy nakaserbisyo sa mga bus pasaheroan nga molabang tali sa Sugbo ug sa Negros Occidental.

Gibutyag ni Diamante sa interview sa DYDD nga hapit na mahuman ang feasibility study sa pagtarok sa bag-ong pantalan sa lungsod ug gipaningkamotan nilang kasugdan ang pagtukod niini karong tuiga.

Ang maong pantalan matud ni Diamante maoy tataw kaayong makapalambo sa turismo ug ekonomiya sa lungsod tungod kay mao man kini magdugtong sa mga biyahe sa mga bus pasaheroan tali sa Tuburan ug sa Negros Occidental ug sa uban pang sikbit nga probinsya sa Kabisay-an.

Karon ang lungsod sa Tuburan nga maoy pinakadako nga lungsod sa tibuok Sugbo kay gilangkoban man kini sa 55 ka barangay miungot sa iyang pagka-second class nga lungsod.

Apan milaum si Diamante nga niining iyang mga proyektong gihan-ay mosirit kining lungsora ngadto sa pagkadakbayan sa dili madugay.

Iya diay usab nga gibutyag nga mihatag na og P6.5 milyones nga counterpart ang Cebu Port Authority (CPA) sa pagtukod sa bag-ong pantalan, gawas sa mga saad sa ubang mga higala niyang tua sa gawas sa nasud nga mopabaha usab sila og hinabang sa mga proyekto nga alang sa kaayohan sa Tuburan. (BANATNEWS)