Jobs fair gihimo sa 3 ka barangay

CEBU, Philippines - Tulo ka barangay sa dakbayan sa Sugbo gipahigayonan og Jobs Fair pinaagi sa committee on labor sa konseho ning dakbayan sulod na sa tulo ka semana.

Kini mao ang mga barangay Talamban, Mambaling ug Sambag diin mikabat na sa kapin 200 na ka mga aplikante sa nagkalainlaing trabaho ang nadawat sa kompaniyang ilang gi-aplayan.

Matud pa ni Konsehal Sisinio Andales, kinsa maoy chairman sa komitiba sa pamuo sa konseho, nga ang maong Jobs Fair gipahigayon matag semana sa nahisgutang mga barangay sa tinguha nga makatabang og dako niadtong mga molupyo nga nagpangita pa og trabaho.

Matud pa ni Andales nga usa kini ka linahi nilang pamaagi tungod kay ang trabaho nay miduol sa mga aplikante lahi sa naandan nga ang aplikante maoy mangita og trabahoan.

Nasayran usab nga mikapin sa 40 ka mga kompanya ang misalmot sa pagpanawat og mga aplikante sa mga trabaho sa hotel, department store, ug uban pa. (BANATNEWS)