Parlors, spa dunay mga protektor - Dr. Bullecer

CEBU, Philippines - Dunay pipila ka mga opisyal sa dakbayan sa Sugbo ang gihulagway nga protektor sa mga massage parlors ug uban pang establisamento nga matawag nga front lamang sa prostitusyon hinungdan nga hangtud karun padayong wala masumpo ang mao nilang mga operasyon. Mao kini ang gibutyag sa kanhi chairman sa City Anti Indecency Board, Dr. Rene Josef Bullecer.

Gibutyag ni Bullecer nga dunay tulo ngadto sa upat ka mga establisamento dinhi sa dakbayan ang lisud gyud mapahunong ang operasyon bisan pa og dayag na kaayong front lamang kini sa prostitusyon tungod sa lig-ong kapit sa mga tag-iya niini ngadto sa pipila ka mga piniling opisyal sa siyudad.

Dugang ni Bullecer nga bisan ang mga polis mahadlok nga molusad og operasyon ning maong mga establisamento tungod sa lig-ong koneksyon.

Nagdumili hinoon pagtug-an sa pangalan sa maong mga establisamento si Bullecer apan midugang nga ang lig-ong koneksyon sa mga tag-iya niini maoy nagsilbing babag sa ilang krusada pagsumpo sa prostitusyon.

Dugang niya nga dihang siya pa ang chairman sa CAIB kaniadto kutob ra siya sa pagpatawag sa mga manager ning maong mga establisamento ug pulos gyud miangkon sa law-ay nga ilang mga pasundayag ug may ‘extra service’ nga gitanyag sa mga customer.

Human moangkon igo rang mangayo og pasaylo apan wala magpasabot nga ilaha nang ihunong sanglit mibalik gihapon sila sa maong operasyon.

Dugang ni Bullecer nga gisuwayan na niya og rekomendar kaniadto nga pasirad-an ang operasyon niini apan wala siya molampos tungod sa lig-ong koneksyon.

Samtang si Lapulapu City Mayor Paz Radaza mimando ni Lapulapu City Health Officer Rodolfo Berame sa pagsusi sa mga massage parlors ug spa sa dakbayan ug uban pang balay kahilayan kun nalambigit sa prostitusyon aron pasirad-an.

Matud pa sa mayor siya isip usa ka babaye ug inahan sa dakbayan dili siya buot nga adunay mga kalihukan o mabutang sa ngil-ad nga imahen ang dakbayan sa Lapulapu gumikan sa maong malaw-ay’ng negosyo.

Sumala pa niini nga mas maayong mailhan ang dakbayan nga usa ka dapit nga “friendly”, maabi-abihon ug dapit nga malinawon ug miawhag sa Konseho pagpanday og ordinansa alang sa pagtukod og ‘Lapulapu City Anti-Indecency Board.  - Darrel Carumba ug Bong Soriano (BANAT NEWS)