Libreng bakuna sa baboy ilusad

CEBU, Philippines - Ang buhatan sa City Veterinary ning dakbayan mopalapad sa ilang serbisyo pinaagi sa pagpamakuna sa mga binuhing baboy batok sa hog cholera.

Apan matud pa ni Dr. Alice Utlang ang hepe sa buhatan sa Veterinarya nga giabagan sa usa ka pribadong kompaniya kining maong kampanya aron nga mapalambo ang produksyon sa karneng baboy ning dakbayan.

Ang maong kompaniya mao ang Univet Nutrition and Animal Healthcare Company, kinsa mitanyag ngadto kang Mayor Michael Rama nga mohatag sila og libreng tambal sa bakuna ngadto sa 1,000 ka baboy ilabi na sa baktin ning dakbayan.

Busa tungod kay may lista na si Utlang sa unom ka mga barangay nga maoy may labing daghang backyard hog raiser, dali kaayo niyang napresentar ang maong mga lugar ngadto sa buhatan sa mayor.

Kini mao ang mga barangay Lusaran, Taptap, Binaliw, Agsungot, Mabini ug Cambinucot.

Dinhi sa maong mga dapit ilusad karong sunod semana ang libreng pamakuna sa mga baboy aron kapugngan ang sakit nga cholera sa mga baboy, kay kun mangamatay ang maong mga hayop gumikan sa maong sakit moepekto usab kini sa ekonomiya sa dakbayan, sumala pa ni Utlang. – BANAT NEWS