Mga opisyal mag-wang-wang gibaoran

CEBU, Philippines - Multang kinse mil, pagsakmit sa wang-wang ug blinkers ingon man ang posibilidad nga kasong administratiba ang nagpaabot niadtong si bisan kinsang mga motoristang masakpang migamit niining maong mga ekipo.

Gipahibalo ni Land Transportation Office regional director Raul Aguilus nga adunay ipakatap nga mga deputized agents sa kadalanan nga maniid ug mo-inspeksyon sa mga sakyanan pagpangita niining mga sakyanang adunay siren ug blinkers.

Unang mimando nga nagdili niini mao si Presidente Benigno ‘Noynoy’ Aquino III kansang mismong iyang convoy gidid-an niya paggamit niini.

Matud pa ni Aguilos sa interbyu sa DyRF nga ang ilang mga deputized agent walay ni bisan kinsang ilhon sa ilang gihingusgang kampanya batok sa ilegal nga paggamit og siren ug blinkers.

Si Aguilos nagkanayon nga ang ilang gipunting karon mao ang mga sakyanan sa mga opisyales gikan sa mga kongresista, gobernador hangtud na sa mayor ug mga konsehal apil na ang mga barangay officials.

Apil sad sa ilang gi-monitor mao ang giingong mga negosyante ug mga asset sa kapolisan ug sa National Bureau of Investigation nga mogamit sad og wang-wang ug ingon man mga sakop sa media.

Si Aguilos miingon nga sigon sa balaod ang Presidente, Bise Presidente, Chief Justice, Senate President ug House Speaker lamang ang may exemption sa paggamit sa siren ug blinkers sa ilang mga sakyanan.

Lakip sa gitugutang mogamit niini mao ang PNP, AFP, kabomberuhan ug medical services sama sa ambulansya. Hinuon ang PNP mimando na sa higpit nga pagsunod pinaagi sa pagsigurong kadto rang opisyal nga gimarkahang sakyanan sa ilang ahensya ang adunay wang-wang ug blinkers.

“Isip role model, ang presidente gani wala mogamit og wang-wang. So I would like to request all politicians, congressmen o si kinsa pa nang mga dakong mga tawo that they should voluntarily remove their wang-wang or their siren and blinkers ug dili sila mohulat nga masakpan sila sa karsada kay ang among marching order is to implement it down to the lowest ranking officials, to confiscate on site kanang mga blinkers that they installed illegally,” sigon pa ni Aguilos. – BANAT NEWS