Ulo sa 17-anyos hapit maputol

CEBU, Philippines - Natu-ay na ang ulo human hapit maputol ang liog sa usa ka 17 anyos nga batan-ong lalaki nga nakit-ang patay sa kasagbutan dili layo sa diskohan atol sa kapistahan ni Sr. San Pablo, San. Pedro sa Sitio Talisay, barangay Poblacion lungsod sa Boljoon kagahapon sa alas 6 sa buntag.

Gituohang gigulgol si Loreto Libradilla, 17 anyos, ulitawo, ug molupyo sa maong lugar.Samtang   wala pa matumbok sa kapulisan ang nagpatay ni Libradilla.

Matud ni SPO2 Roderick Roma sa Boljoon Police Station sa dihang nahinabi sa Banat News nga ang biktima mitambong og disko ug katapusang nakit-an nga naglingkod sa bangko sulod sa diskohan alas 2 kagahapon sa kaadlawon.

Apan pagka alas 6 sa buntag kagahapon nakit-an nalang kini sa tanod nga si Cerilo Medez nga nagbuy-od na nga nag-ubo nga nagkadugo ang liog ug wala nay kinabuhi.

Sa pagresponde sa mga polis nasuta nga naputol gyud ang ubol ubol sa biktima og hapit maputol ang liog niini nga gituohang gigulgol ug hait nga hinagiban ingon man naputol na usab ang wala nga ikaduhang tudlo niini. –  BANAT NEWS