Binghay: Psychiatric Test ni Joavan

CEBU, Philippines - Gawas sa pagpaubos sa drug rehabilitation, ang episcopal vicar sa Artsidyosesis sa Sugbo nga si Msgr. Esteban Binghay mitambag kang Mayor Socrates Fernandez sa Talisay nga ipaubos usab si Joavan sa psychiatric examination.

Kini aron maundang na ang dili maayong binuhatan ug batasan ni Joavan nga pagkabadlongon ug pagsamoksamok sa mga inosenteng sibilyan.

Si Binghay sa dihang nahinabi sa DyRF mihulagway nga si Joavan “na-overprotected sa iyang amahan nga mayor” hinungdan nga misamot kini og gara sa paghimo og mga dili maayong mga binuhatan.

Matud pa ni Binghay nga si Mayor Fernandez angayan nga mokuha og usa ka psychiatrist aron masubay ug matangtang “kun unsay samad sa iyang kinabuhi ug emotion” ni Joavan.

Matud pa ni Binghay nga posibleng ang problema sa batasan ni Joavan nagsugod gikan pa sa pagmabdos sa inahan niini hangtod nga kini napanganak.

Si Binghay miingon   nga ang kagrabe sa emosyonal nga gibati ug ingon man ang grabeng depresyon sa inahan maoy nakaapekto sa panghunahuna ug kinaiya ni Joavan karon.

Gipasabot ni Binghay nga sa higayon nga malangkat gikan sa kasingkasing ug hunahuna sa anak sa mayor ang tinaguang kaligutgot ug kahiubos, hayan mausab ang iyang pagka-tawo.

Samtang gitataw ni Binghay nga ang Simbahan mahimong makatabang sa anak sa mayor pinaagi sa value formation seminar ug uban pang relihiyosong kalihukan, usa na niini mao ang counseling.

Hinuon wala usab gisalikway ni Binghay ang kakinahanglanon sa pagpaubos ni Joavan sa drug rehabilitation sumala sa gibalikbalik nga sugyot ni Kongresista Eduardo Gullas ug ubang mga kaubanan sa politika apil na ang kontra sa politika kay makatabang kini og dako kun ang anak sa mayor tinuoray nga nagumon sa ginadiling drugas.

Sa iyang bahin, si Mayor Fernandez nagkanayon nga iyang dawaton ang mga tambag gikan sa iyang mga suod nga higala ilabi na gikan sa Simbahan.

Gani, nakatambong na og value formation seminar si Joavan niadtong nakalabay’ng semana ug nagpasalamat siya nga naminaw ug namalandong usab ang iyang sinagop sa maong seminar nga gipangulohan sa kura paruko sa simbahan sa Talisay nga si Msgr. Rommel Kintanar.

Apan iyang gitataw nga gikinahanglan nga iyang sagupon ang mga tambag sa iyang mga consultant ilabi na sa iyang higalang huwes nga mitumbok nga makaapektar sa kaso sa korte kun ipaubos sa drug rehabilitation si Joavan. – BANAT NEWS