LP members mohurar ni PNoy

CEBU, Philippines - Kun ang mga nakadaog nga mga kandidato ubos sa One Cebu Party gikan sa gobernadora hangtod na sa konsehal matag lungsod manumpa atubangan ni Presidente Gloria Macapagal-Arroyo, ang mga sakop sa Liberal Party mohurar usab atubangan kang President-elect Senador Benigno “Noynoy” Aquino III.

Gitataw hinuon ni Bise Gob. Gregorio Sachez nga ang ilang seremonyal nga pagpanumpa sa ilang katungdanan atubangan kang Aquino ipahigayon sa Hulyo sa wala pa matinong lugar.

Si Sanchez miingon nga manumpa siya atubangan ni RTC-7 Executive Judge Meinrado Paredes sa White Gold House karong Hunyo 29 ug siya usab unya ang magpahurar sa nag-inusarang Liberal sa hunta probinsiyal nga si Arleigh Sitoy sa ika-unom nga distrito ug sa tanang mga mayor ngadto sa mga konsehal.

Iyang gitataw nga ang manumpa nga mga mayor sa Liberal mao sila si Mandaue city Mayor Jonas Cortes, Mayor Celestino Martinez Jr. sa Bogo, Mayor-elect Teresa Alegado sa Consolacion, Mayor-elect Antonio Canoy sa San Fernando, Mayor-elect Geraldine Yapha sa Pinamungajan ug Mayor-elect Aljun Diamante sa Tuburan.

Sanglit higpit ang schedule ni President-elect Aquino human sa makasaysayanong pagpanumpa sa katungdanan niini, si Sanchez nagkanayon nga ilang agdon kanus-a mahimong bukas ang panahon sa napiling presidente sa bulan na sa Hulyo alang sa ilang ceremonial oath taking sa Sugbo.

Gipahibalo usab ni Sanchez nga sugod sa Hulyo, si provincial board member Teresita Daday Celes hulipan na sa vice president sa Federation of ABC Presidents nga si Kapitan Ribomapil “Joeyboy” Holganza Jr. sa lungsod sa Bantayan tungod kay molingkod na si Celes isip mayor sa lungsod sa Boljoon.

Apan iyang gitataw nga kinahanglan nga makakuha una og rekomendasyon gikan sa National Federation of ABC Presidents si Holganza una pa kini hingpit nga makalingkod sa hunta probinsiyal.  – BANAT NEWS