Pusher nasikop

CEBU, Philippines - Nasikop sa kapolisan sa siyudad sa Carcar human sa gipahigayong pagpangronda ang usa ka inilang tigpayuhot og ginadiling drogas sa sitio Lumboy, barangay Liburon sa miaging hapon pasado alas-5 sa hapon.

Ang nasikop mao si Rodulfo Saducas, Reponoya, 57, molupyo sa maong lugar pinasikad sa search warrant nga giluwatan ni Judge Silvestre Maamo Jr. ang presiding judge sa RTC branch 17 tungod sa kalapasan sa section 11 ug 12, article 2 sa RA 9165.

Ang kapolisan gipangulohan ni Insp. Anecito Gesalago ug mga kaubanan nga sila si SPO1 Meliton Agadier Jr., PO3 Alex Paden, PO3 Jose Repompo ug PO2 Alex Buanghug Jr. nakakuha og 44 ka paketeng may sulod nga gituuhang shabu.

Lakip sa nakuha ang duha ka gagmay nga plastic containers, duha ka lighters, usa ka gunting, usa ka improvised bamboo heat sealer, ug mga pinutol nga plastic packs.

Si Sr. Supt. Erson Digal hepe sa kapolisan sa lalawigan nagkanayon nga level 3 drug pusher si Saducas.  – BANAT NEWS